Gjatë dëshmisë së tij, Noizy ka rrëfyer rrethanat e konfliktit me Kleviol Ahmetin, duke deklaruar se në banesën ku jetonte në Durrës ishte vendosur një sasi lënde plasëse në katin e parë të pallatit.
Sipas tij, në momentin e shpërthimit ka qenë në gjumë dhe është zgjuar rreth orës 09:00, ndërsa ngjarja dyshohet të ketë ndodhur mes orës 03:00 dhe 04:00 të mëngjesit.
Ai tha se shpërthimi shkaktoi dëme të konsiderueshme në hyrjen e pallatit, në xhamat e lokalit dhe të dyqanit në pronësi të tij, si edhe krijoi një gropë në tokë. Noizy shtoi se prindërit e tij jetonin në të njëjtin pallat, në një kat më sipër.
Në dëshminë para trupit gjykues, reperi e lidhi ngjarjen me konfliktin që kishte pasur me Kleviol Ahmetin. Sipas tij, një ditë para shpërthimit kishte ndodhur një përplasje verbale dhe fizike mes tyre në lokalin e tij, ndërsa më pas ndodhi vendosja e eksplozivit.
